حبوب شيبوب --- مزمل ابوالقاسم

حبوب شيبوب!

*كانت خطة استعادة الواعد شرف شيبوب تستند في البداية إلى ترك الهلال يكمل تسجيله في نادي الملكية، واستعادته بعقد احتراف بعد عودته إلى الخرطوم، لأن نادي الملكية كان سيضطر إلى تسجيله كلاعب هاوٍ، لعدم وجود احتراف في اتحاد الجنوب.

* مجلس الكاردينال لم يكن يعرف أن اتحاد الجنوب لا يسمح لأنديته بالتعاقد مع اللاعبين!

* المخطط المذكور تم تغييره بعد أن نجح كوماندوز المريخ في تحديد مكان اللاعب في جوبا، وأفلح في ربطه بمكالمة هاتفية مع الرئيس المحبوب جمال الوالي، فحثه على العودة لناديه، وقدم له تعهدات شخصية بتسهيل تحوله إلى محترف بعقدٍ مجزٍ.

* كذلك أفلحت المحاولات التي قادها الأخ آدم سوداكال بمعية الأخ أسامة ونسي وعادل أبو جريشة في تليين مواقف أسرة اللاعب، وأقنعتهم بخطأ انتقال اللاعب إلى جوبا، وسهلت الوصول إلى اتفاق مادي معهم.

* كالعادة سهل إعلام الهلال مهمة المجموعة المريخية التي آلت على نفسها السعي إلى استعادة اللاعب الواعد من جوبا، بالاستعانة بذات المجموعة التي هربت ألوك من مقبول!

* ظلت المجموعة على اطلاع بكل خطوات الهلال بمتابعة صحف الهلال!

* لذلك نقترح على منظمي مهرجان الزعيم المبادرة بتكريم الرشيد وفطومة وبقية العقد الفريد، لأنهم قدموا للمريخ خدمات قيمة، لم يقدمها له مزمل وسلك وأبو شيبة وكابو وبقية إعلاميي الزعيم!

* المضحك حقاً أن مقبول ظل على يقين بأن كل ما نشرناه عن هروب شيبوب مجرد هراء، وأن اللاعب ما زال في جوبا، بدليل أنه طلب من بعض الإعلاميين الرياضيين الجنوبيين مساعدته في الوصول إلى مقر إقامة اللاعب، وخصص مكافأة دولارية لمن يدله عليه!

* يا مقبول.. أصلو ما معقول!

* فات على وفد الهلال المكلف بنقل ولدنا إلى الملكية أن شيبوب مشهور بالقفز العالي، بدليل أنه (نط) أعلى من كل مدافعي اتحاد العاصمة الجزائري، وسجل هدفاً رأسياً جميلاً نقضه مساعد الحكم المالي براية ظالمة.

* النطة الخطيرة تكررت في جوبا الجميلة!

* الفرق بين (نطة الجزائر) و(نطة جوبا) أن الأولى تم نقض الهدف الذي نتج منها، بينما أفلح شيبون في تسجيل أجمل قون من النطة الثانية!!

* قون بيخطف العقول.. يا مقبول!!

* عنوان مقال الأمس (أكسح وأمسح)!

* وشعار مقال اليوم (أقرأ وأضحك)!

* ضباط وضباط صف وجنود قوات الاحتياطي المركزي احتفلوا بعنوان مقال الأمس لأنه استخدم شعارهم الشهير (أكسح.. أمسح.. جيبو حي)!

* الجديد في الأخبار أن وزارة الصحة الاتحادية طرحت دواءً جديداً في الصيدليات، اسمه (حبوب شيبوب)!

* حبوب شيبوب لا علاقة لها بالتي طلبت المنسقة الإعلامية للهلال من جماهير الزعيم أن تبتلعها بعد عملية نقل النجم المحبوب إلى مقبول في جوبا!

* من أهم دواعي استعمال حبوب شيبوب:

* 1/ معالجة أمراض حب الشهرة، وعشق التقاط الصور مع اللاعبين قبل تسجيلهم!

* 2/ داء الاعتماد على الهواة وفاقدي الكفاءة في الإدارة والتسجيلات!

* 3/ كل أعراض الانسحاب.. بلا أسباب!

* 4/ الميل إلى العنتريات وافتعال الأزمات والحديث عن اتحاد اللقيمات!

* 5/ التلويح بحل الاتحاد وإلغاء قرارات لجنة الاستئنافات بلا مبررات!

* 6/ الخضوع للأمر الواقع، وسحب قرار الانسحاب بدون مكاسب، بعد إهداء البطولات للخصوم!

* 7/ النقص الدائم في إنزيمات التسجيلات!

* 8/ نقص الثقافة الكروية، وضعف الكفاءة القانونية!

* 9/ ميل المتأثر بداء نقص التسجيلات الناجحة إلى شراء كروت اللاعبين الهواة والاحتفاظ بجوازات سفر اللاعبين بدون مبرر (مقبول)!

* 10/ داء تهريب اللاعبين الهواة عبر كباري وهمية، إلى دولة يحظر قانونها التعاقد مع اللاعبين!

* لكل داء دواء.. إلا الحماقة، أعيت من يداويها!!

* لو عايز من الشقاوة تتوب.. أبلع حبوب شيبوب!

إخلاء مرافق شيبوب

* مسئولين من الخير، الزول الرافق شيبوب إلى جوبا، والتقط معه صور في مطار الخرطوم، وفي الطائرة، وفي مطار جوبا، وفي نادي الملكية، وفي الفندق، وبث الصور في الواتساب ومواقع الإنترنت، ولم يقصر في توثيق الرحلة بصور (السيلفي).. رجع من جوبا وللا لسة عالق هناك؟

* شيبوب المشى معاهو رجع، المقعدو في جوبا لي هسة شنو؟

* الزول ده لو عالق لسه عند مقبول، وما لاقي طريقة يتخارج.. كلمونا.. ممكن نرجعو ليكم!

* ونديهو خيارات للعودة كمان!

* شرطنا الوحيد: الإخلاء للعودة، لابد أن تسبقه (نطة)!

* كلموا زولكم ده يبقى عشرة على جوازو.. مقبول لا يقلعو منو!

* سمعنا أنه تاجر موبايلات.. الوصية بالمهلة: ولدنا النطاط خلى موبايلو بطرف مقبول، ما تنسى تجيبو لينا معاك يا أخونا!!

* وكمان لو جبت لينا الشنطة.. تكون تب ما قصرت!

* يا مسافر وناسي شيبوب وألواااااك.. جوازاتنا وموبايلاتنا معااااك!

* تررررم ترررم ترم!

أقرأ واضحك!

* الأيام دي إعلام الكاردينال بقى أخطر منافس لفرقة (تيراب الكوميديا)!

* مش قلت ليكم كل الأعمدة في الحفظ والصون؟

* قبل أيام كتب خالد عز الدين ما يلي: مساااااكين.. كل القدرو عليهو قالوا شرف شيبوب ما بقدر يلعب في الهلال الا بعد سنة ونص.. لا قالوا الكاش بقلل النقاش.. لا قالوا لاعبنا وبنرجعو.. لا قالوا الهلال ما بقدر يشيل اللاعب.. لا قالوا العفش داخل البص علي مسؤولية صاحبه.. لا قالوا نتحدى.. لا قالوا ولا قالوا.. كل القالوا سنة وزيادة.. عامر الجوهري بس (يا الطال غيابك طال.. سنة وزيادة.. قول لي كيف.. ألقى السعادة)!!

* وكتب: شيبوب مشي يا دوب.. مشي الجنوب.. من هسة تحسب يا حبوب، الباقي ليك سنة وزيادة، وبعد السنة والزيادة دي بجيكم ولا بجينا؟)!

* وكتب: (نحن أصلا ما شفقانين.. يجي بعد سنة يجي بعد سنتين.. علي راحتو.. (علي كيفك تفوت.. علي كيفك تعال) دي بالمناسبة الحان صلاح إدريس لكن الكلمات للكاردينال.. والكاردينال قال لي أمشي وتعال (سنة وزيادة)!

* وكتب: (الجماعة مسكوا ليك في المادة 55 من الصباح شغالين.. شيبوب مشى لكن ما بجي راجع الا بعد سنة وزيادة.. مسؤولين من الخير.. المشكلة في مشيتو ولا المشكلة في رجعتو.. دي زي المادة 105.. الحساب ببدأ من مشيتو ولا من رجعتو؟ انتو مالكم ومال رجعتو.. خليكم في مشيتو.. نحن بالنسبة لينا ما عندنا مشكلة في رجعتو ولا في مشيتو.. عايزين نمشي مشيناه.. وعايزين نجيبو بنجيبو.. المشكلة فيكم انتو.. ويا سلام.. سافر مشي ولا قال سلام.. دي من كلماتي أنا.. ههههه.. والله الاغاني اليومين دي بقت ساهلة خلاص.. وقالوا لي شيبوب.. مشى الجنوب.. والرجعة ذاته بعد.. سنة وزيادة) !

* وكتب: (ضربة من أمها.. من النوع البودي المستشفى طوالي.. خصوصا في البرد ده.. الضرب شديد وزي ما بقولوا أخوانا في المنتديات (بالحتة الفيها الحديدة)!

* (لو الهلال عايزو يطلبوا رسميا من الملكية.. لو الملكية وافق خلااااص.. لو ما وافق نجيبو بي أبييي.. نطلع ليهو شهادة اقامة.. نسجلوا لاعب جديد.. تقولوا أي حاجة نكلم ليكم سمير فضل.. هي أبييي دي حقتكم براكم.. نحن برضو كنا عايشين فيها.. سنة وزيادة)!

آخر الحقائق

* ده ألذ عمود لخالدونا!

* عمود بالحتة الفيها الحديدة.. والنطة الشديدة (دي من كلماتي أنا.. ههههه)!!

* يا خالدون.. شيبوب مشى الجنوب.. بحبوب وللا من غير حبوب؟

* شيل الصبر يا حبوب!

* العمود فيهو باقي يا عبد الباقي!

* بكرة نحكي ليكم قصة عبد الباقي.. وأصلوا الباقي باقي.. دي أوعوا تقولوا كلماتي أنا!

* الحالة نحن لسه مع مقبول، أقصد مع خالدونا، وما مشينا على محمد عبد الماجد!

* ود عبد الماجد ده بقى أخطر من محمد موسى وقلواك وفخري وأسامة جنكيز!

* أعمدته عن شيبوب تموت من الضحك!

* معليش.. في حتة في عمود خالدونا غلبني تأجيلها لي بكرة!

* حتة لذيذة خالص!

* هيييييييه.. كتب فيها أيه؟

* كتب: (الجماعة قعدوا مع شيبون قبل يومين وشايلين ليهم ألفين.. قال ليهم زيدوها سنة وزيادة.. قالوا لي النعسان جبناهو بمائة الف.. قال ليهم لكن أنا صااااحي)!!

* هل تدري يا نعسان أنا كرتي ظااااهر!

* جسمي اتنحل بي جوازك.. وانت ناااافر!

* مش قلت ليكم لذيذة؟

* طالما طلعت لذيذة.. أحسن نزيدها!

* هييييييه.. خالدونا تاني كتب أيه: (تعود الهلال علي ضرب المريخ في الارتكاز من وهبة وادوارد وعلاء وحمودة.. بس ضربة شيبون دي تاريخية.. رقم قياسي.. لأول مرة في التاريخ لاعب يشيلو من جووووه الكشف.. قاعد مسجل.. لاعب في المريخ.. اسمو موجود والله.. والتسجيلات انتهت.. والجماعة قفلوا خلااااص.. عملوا الترتيبات.. في الهجوم بكري وتراوري.. تراوري ما جا.. في الوسط المتقدم اوكرا والوك.. الوك قصتو ما معروفة.. في الوسط المتاخر.. عمر بخيت وشيبون !! ههههه وسنة وزيادة)!

* سنة يا هنا؟

* مش قلال ليكم ليكم العيون.. على اليورو وشيبون؟

* نقيف هنا وللا نمشي لي ناس كتور بي كوبري الملكية؟

* هيييييييه.. ولازم نشوف الرشيد كاتب أيه!!

* الرشيد أخطر من ذاكر سعيد!!

* لو ما خايف العمود يطول.. كان كلمت ليكم مقبول.. هههههه!!

* آخر خبر: سري للغاية: السن بالسن، والعين بالعين، وكوبري الملكية بكوبري المنشية، والبادئ أظلم!

يا (مقبول) ما دي الحقيقة !
هيثم كابو

* والسؤال الذي يفرض نفسه :

من الذي يُهدِي الزعيم انتصارات التسجيلات ويُكبِد نفسه خسائر لا تحصد ولا تعد ..؟ الإجابة ببساطة شديدة : إنهم أقطاب وإعلام الهلال؛ والضحية للأسف الشديد في كل الأحوال رئيس النادي أشرف الكاردينال رغم أنه لم يبخل على فريقه بالمال ..!

* لم تكن ضربة (ألوك أب كرت) الأولى، كما إن (عودة شيبوب) ليست الضربة الأخيرة ..!

* مشكلة الوصايفة أنهم لا يتعظون؛ ويركضون بلا تفكير خلف لاعب لا يعرفون حتى الآن إن كان إسمه (شيبوب) أم (شيبون) ..!

* قبل أن نمد ألسنة السخرية في وجه الأهلة الذين كانوا موضع تندر الناس بالجنوب دعونا نرجع بهم للوراء قليلاً ثم نعود لقصة العائد شيبوب ..!

* كثيرة هي الحكاوي والأسرار ..و(المطلوب من الجميع عدم اصطحاب الدهشة فبعض ما يعرف يجب أن يقال) ..!!

* في العام الماضي نفّذ جمال الوالي عملية (تعدمون) بحبل هلالي متين لفه أبناء الأزرق حول رقابهم، وجمال وقتها يكتفي بالنظر و(فرفرة) العرضة شمال كانت تشير إلى أن كل الفريق في خطر .

* وعند ما يقول لك الناس : (الزول دا يدو "جريدة واحدة" وممنوع يدي بنية بقرار من القاضي) فيجب أن تبتعد عنه، و(ضربة الوالي) في تسجيلات العام الماضي كانت ب(جريدة واحدة) فشل القاضي في توقيفها ..!!

* بمناسبة : (الجريدة الواحدة) لا بد أن نشكر صحيفة الجوهرة الرياضية التي (انفردت) بخبر خطف شيبوب ف(انفرد) رجال الزعيم بالمعالجة في عملية عرفت باسم عاصفة (الحسم) ..!

* قدمت الجوهرة (السبق) على المصلحة الهلالية، فكان لها (الخبر) ولنا الحسم و(تعقب الأثر) ..!

* لا تلام الجوهرة علي الانفراد، ولكن يلام من نفذ العملية على التسريب و(الانفلات) ..!

* نشكر الجوهرة على (السبق الخطير)، ولا عزاء لبقية الصحف الهلالية التي لم تجد من الأخبار غير حسرة نبأ هروب شيبوب وتسلقه للمواسير ...!

* فعلاً تسلق شيبوب (المواسير) ..!

* دعونا من (جريدة خبر شيبوب) ولنعود إلى ضربة بكري المدينة بيد (جريدتا واحدة) ..!

* هسه الجرائد الكتيرة ضرتكم لو كانت (جريدتكم واحدة) ما كان دا بقى عليكم ..!

* سدد الوالي (ضربة بكري المدينة)، وسرب من هم حوله معلومات عن فتحه خطاً ساخناً مع (كباتن الهلال التلاتة) منفذاً سياسة (تشتيت التسجيلات)، وهذه ضربة فنية معقدة تشبه لحد كبير نظرية (تشتيت الأصوات) في معارك الانتخابات ..!!

* طبعاً جماعة الكاردينال ما فاهمين النظرية لأنهم ما ناس تسجيلات وانتخابات ..و(البرير حشد العضوية، وعمل زي مدربين الهلال زمان وقال لأشرف : “يلا يا كردنة متعنا ومتع نفسك بزعامة الأمة الهلالية) ..!!

* بصراحة ..(الهلال فقد خليفة كلاعب، لكن جاب زعيم) ..!!

* احترموا زعيم أمة الهلال، فالرجل (كرّدن) النادي بالديمقراطية ..(ولا للوقوف في وجه الشرعية) ..!!

* مشكلة الهلال .. يا (مواسير) يا جرايد شفقانة يا (طوابير) ..!!

* طالما أن (زعيم أمة الهلال) أشرف الكاردينال وصل لرئاسة النادي، ينبغي على صلاح إدريس وأنصاره المؤيدين وضع السلاح والوصول لصيغة هدنة واتفاق تهدئة ناجع ..و(الأفضل لكم وللفريق القبول بالأمر الواقع) ..!!

* احترموا الكاردينال حتى ولو خسر (العقرب وألوك وشيبوب) وتذكروا جيداً أنه كان يحترم كل من يجلس على كرسي رئاسة الهلال .

* سيبكم من احترام زعيم أمة التسجيلات وخلونا نرجع نعيد ليكم تفاصيل نظرية (تشتيت الأصوات) ..!

* كانت نظرية (تشتيت التسجيلات) العام الماضي فيها هزة جماهيرية وبعد (شعبي)، وكأنها مستوحاة من أفكار (الدكتور حسن الترابي) ..!!

* طبعاً الترابي رغم أختلافنا الإيدلوجي معه إلا أننا نشهد بأنه (ملك التمويه السياسي)، وممكن يجر (حزب كامل) في (قعر فنجان) ..!!

* الترابي لو دخل المشهد السياسي في الزمن الضائع و(خت الكورة واطة) بجهجهه المعارضة والحكومة وما تبقى من أحزاب، وبراوغ الجميع ويذكرك كمال عبد الوهاب ..!!

* سيبكم من الترابي لأنو الزول دا لو ركز مع الكورة 24 ساعة بحسم موضوع شيبوب و(اللاعب قاعد في البيت) ..!!

* الرجاء التركيز فنحن بصدد العودة لكشف أسرار ضربة (حبل الإنهزام) ..!!

* خرجت كل الصحف صبيحة اليوم الذي تلى تسجيل بكري المدينة للمريخ تتحدث عن (الضربة القاضية) بعد توقيع (العقرب) في كشوفات الزعيم …و(الوالي وحده كان مندهشاً لما يحدث ويطالع الصحف والابتسامة مرسومة على وجهه) ..!!

* عندما يضحك الوالي فإن الموضوع أكبر من أن يكون تسجيل لاعب واحد حتى ولو كان (العقرب) ذات نفسه (!!!!!) .

* وحتى صلاح إدريس الذي يعتقد بأن التسجيلات لعبته (بلع الطعم) وخاض مع الخائضين في أمر المدينة ..!!

* أنشغلوا باصطياد الوالي لحصان جامح، مع أن الضربة الحقيقية كانت في خروج (الملك والوزير والرخ) خارج (رقعة) الحسابات، وهكذا يلعب الأذكياء في (شطرنج التسجيلات) ..!!

* نعم بكري هو المهاجم الوطني الأول ولكنه يبقى في النهاية لاعباً واحداً، و(الضربة القاضية) لم تكن في انضمامه بل في خسران (الند الهلال) لكل لاعبيه الوطنيين، وحصره للدوران في (فلك البحث عن محترفين) ..!!!

* من يريد مجادلتنا عليه مراجعة الكشوفات فالهلال لم يسجل العام الماضي لاعباً وطنياً غير فيصل موسى (وتلك قصة تحتاج مقال منفصل) ..!!

* كبسولة أيام التسجيلات المحدودة تمضي بسرعة، وفجأة تشرق شمس الهلال على حقيقة فقدانه لكل لاعبيه مطلقي السراح بضربة واحدة، و(بالون الاختبار) ينفجر في المعسكر الأزرق فيظن كردنة أن جمال سيسدد له ثلاث ضربات أخرى بتسجيل (عمر بخيت ومهند الطاهر ومعز محجوب) فيسعى لحفظ ماء وجهه و(إعلان عدم رغبته في التعاقد مع الكباتن الثلاثة ويتعلل بالعمر رغم دخوله لتفاوض مارثواني معهم)، وإصدار البيان هو ما كان يرغب فيه جمال لا تسجيل اللاعبين ..!

* مالي أرى الأحداث تتطابق أمامي والواعد معتصم أغلق الباب في وجه فريقه قبل أن يغلق الهاتف ..!

* قطع الهلال يومها الطريق على نفسه ببيانه وأصبح كمن لف (حبل الانهزام) حول رقبته، وهنا اتجه الوالي للنظر في الأسماء المرشحة وضمن خسران الهلال لعموده الفقري بضربة واحدة و(هنا يكمن التكتيك) ..!

* الآن .. الهلال يكبد نفسه الخسائر ويشتري الهزيمة رغم أنه هو من يحدد أرض المعارك ويبادر بالهجوم، وفي كل مرة يرجع منكسر ومهزوم ..!

* وغداً نحكي بقية التفاصيل فالقصة أمتع من أن تنتهي في مقال واحد ..!

نقوش متفرقة

* نتمنى الا يدفع مقبول مدير مكتب الكاردينال ثمن خسارة الهلال لشيبوب، فالرجل لم يقصر أبداً و(ما خلى زول ما سألو في الجنوب) ..!

* يا مقبول خليك مع حسابات الكاردينال وأبعد من الزعيم و(اللعب بالنار) ..!

* ناس مقبول لم يراجعوا التاريخ عشان كدا قالوا الموضوع محسوم و(قطعنا الطريق علي المريخ) ..!

* يا مقبلة لو باريت المريخ عشان (تقطع الطريق) عليهو في لاعب المريخ دا (بقطع عيشك) ..!

* إتقطعي ..!

نقش أخير

* يا (مقبول) ما دي الحقيقة

رغم أنك ما بتطيقا .. !.

» كبد الحقيقه مزمل ابوالقاسم
» كبد الحقيقه مزمل ابوالقاسم
» كبد الحقيقه مزمل ابوالقاسم
» كبد الحقيقه مزمل ابوالقاسم
» كبد الحقيقه مزمل ابوالقاسم